Psa 45 | MEU | STEP | Lalogu na ḡau namona amo e hepurai dobimu; egu hereva na hanua pavapavana enai na gwauraiamu, malagu na toretore e manadamu tauna ena pen na heto.

Psalms 45

1 Lalogu na ḡau namona amo e hepurai dobimu;
egu hereva na hanua pavapavana enai na gwauraiamu,
malagu na toretore e manadamu tauna ena pen na heto.

2 Taunimanima natudia iboudiai bogaragidiai
oi mo sibomu o raho namo hereamu;
harihari-bada na bibinamu ai e hebubu kaumu,
taunabunai Dirava ese vada e hanamomu hanaihanaimu.
3 Siahu taumu e, emu dare na koekoemu ai bavatoa,
mai hairaimu ida bona mai siahumu ida.
4 Emu hosi ai ba gui, mai siahumu ida baola, ba kwalimu;
hereva momokani dainai bona kara maoromaoro igimana totona,
imamu idibana ese hahegari karadia baine hadibalaimu.
5 Emu diba na mai matadia, hanua pavapavana inaina kudoudia ai e hedai kaumu;
bese idau-idau taudia na oi henumu ai e ketomu.

6 Oiemu terono helaḡana e mia hanaihanaimu,
oiemu pavapava aurla na hahemaoro auna.
7 Kara maoromaoro o ura henimu,
bona kara dika o inai henimu;
taunabunai Dirava, oiemu Dirava, ese vada e horomu,
moale dehorona vada e horolaimu, oi bamomu daediai.
8 Emu dabua amo muro bona aloe bona kasia ^{▼▼“Muro” bona “aloe” bona “kasia” na muramura mai bonadia ladadia. “Aivori” na elefant doadia.} bonadia e daemu;
pavapava edia aivori rumadia amo hatai-hatai ḡaudia ese e hamoalemumu.
9 Pavapava natudia hahinedia na emu ruma hahinedia bogaragidiai;
oi idibamu kahana ai pavapava hahinena mai Ofirigold dabuana ida gini.
10 Hane-ulato e, a haeroa, a hakala henigu,
emu bese taudia bona tamamu ena ruma ba lalodia boio;
11 bena hanua pavapavana ese oi hairaimu baine ura henia.
Ia na emu lohia dainai ba igo henia diho;
12 bena Turo ulatodia na herahia bae mailai.
bona taḡa herea taudia edia noinoi na oi dekemu bae mailai.
13 Hanua pavapavana natuna kekenina na mai hairaina, ena daiutu lalonai;
ena dabua nagold varodia ai e haheraiamu.
14 Dabua herea-daedia ai ia na hanua pavapavana dekena e hakaua vareaimu,
mai bamona, hane-ulato rami-heboudia, ida, ia murinai e rakamu;
15 mai moaledia ida, mai moale-badadia ida e hakaudia laomu,
hanua pavapavana ena ruma ai e raka vareaimu.

16 Natumui mamaruanedia ese tamamui bae bolodia,
tanobada idoinai lohiadia ai ba halaodia.
17 Oi ladamu baina habadaia, uru iboudiai ese bae imodaia,
taunabunai bese idau-idau ese bae hanamomu ela bona hanaihanai.